Accademia Ars Artis

Liviana Cunego – UN FIOR ETERNO

Quando le’ notte
tutto quanto tase,
gnanca le ore batte
el campanil.
Tutta la gente dorme,
ne le case,
sognando, forse,
un doman più rosa
parche’ el presente
le’ tristo e duro, asse’.

Dorme anca el bosco,
zo’ par le valade,
fermo e muto
come un lago nero.
Gnanca na luce
a ris-ciarar le strade,
eppur, al scuro,
bianche i è le case..

Nessuno in giro,
ombre rapolade,
doman el sol,
el vegnara’ a stirar.
Tutto le’ chiete,
le’ silensio e pace.
Anca la luna le’ andada
a riposar.

Epur qualcosa va’,
par le contrade:
un struggimento,
un pianto antico
che nol pol finir,
che va’ nel scuro
come un fil de fumo,
che nol se vede,
ma chel se fa sentir..

Le’ un cor che pianze
un amor lontano,
un amor perso,
che mai ritornara’..
Le’ un cor de casa
struca’ chel se dispera
par un mari’,
un papà,
un fiol finido in guerra,
tanto aspeta’
e mai più ritorna’.

E no ghe ciel
e no ghe mar
e no ghe tera!
Che sappia dirghe
dove le’ resta’
a quel cor,
che se dispera
e prega:

Oh Madoneta,
ti te si ‘na mama,
te si ‘na mama
e te me pol capir,
parche’ un fiol
te ghe l’avei anca ti
e te le’ perso
par trista man de gente
che te l’ha tolto,
fasendolo morir.

Oh Madoneta,
ti te si de piera:
fredda, lì sul to altarin..
ma el cor, no,
no te ghe le’ de piera,
ma de sangue
come ghe l’ho mi.

E allora dime!
Te scongiuro dime!
Dove le’ quel fiol
che no disegno più
con i me oci,
che no pitturo più,
con el me cor…

Dime quala le’ la tera
che lo querse
se le’ de giasso
o se le’ de sol..
E da che ciel,
a bagnarlo,
acqua piovara’
e quale i è le stele
che, de note,
le lo vegliara’…

Fame saver!
Fame saver così che là
mi possa andarghe!
Fame saver, così che là,
mi possa sdraiarme
sora a quela tera
e fin là sotto mandarghe
el me calor!

Fame saver,
cosi che là mi possa
pianzar tanto
fin a desfarme el cor,
fin che da le me lagrime
possa nassar un fior:
eterno…
no par un solo di’

e dopo, Madoneta,
Madoneta Santa,
cateme su’…

E porteme con ti!”.