Accademia Ars Artis

Liviana Cunego – MADONE

Quando ò caminà /
du passi più lontan /
da la me casa, /
ò incontrado /
su la strada /
‘na Madona /
con el gesso disegnada. /

“Questa lè del cardelin” /
El mà dito, /
el scribachin. /

Dentro in ciesa, /
invesse ghera /
la Madona del rosario /
sempre drita /
in preghiera /

La me nona inzenociada /
ai piè del leto /
la pregava la Madona /
del lagheto parchè /
stesse vivo e santo /
ogni so buteleto /

Me papà zò in cantina /
el gavea la Pellegrina /
dolce e bela Madonina /
da pregar, /
quando el ‘ndava /
a travasar /

Su noaltre butelete /
nostra mama la invocava /
la Maria de la Salette /

Na me sia golosona /
la gavea in devossion /
la Madona de Cremona /

E me nono, /
col santin sul nissol, /
el pregava la Madona /
che stasea a l’Altarol /

Pensa ti che confusion! /
Quante ele ste Madone /
tute bele, tute bone /
col musin chel par /
de cera..? /

Ghe nè in meso una nera! /

Qua ormai se fa matina /
voi pregar la Madonina /
che lè mama del Signor /
no’ capisso quala sia /
ne sto s-ciapo de butele… /

Mi son solo ‘na butina /
e così par no’ sbagliar /
prego sempre ‘na Madona… /

‘Na Madona come mi: /
picenina!
         liviana