Liviana Cunego – NOTTE SANTA
Ghe ‘na casa picoleta
dove sta ‘na man de dona, che ricama un coredin con un bianco fil de luna.
Sù nel ciel, sensa le stele, passa intanto ‘na cometa: tuti quanti guarda in sù, la par quela de la note che nassèa el bambin Gesù…
Da la casa picoleta, tacà l’ultimo botòn, quela dona la se invìa drìo la sìa de la cometa.
L’atraversa la foresta, la campagna, la montagna, fin rivar a ‘na capana, dove, ormai sfinìa ‘na mama, alatava ‘na putìna ch’era nata el giorno prima.
L’era tanta la miseria che fodrava quela stansa, ma de più la dignità, la netessa, la creansa…
“Questa lè ‘na note Santa ” la ghe dise a quela mama, “E ‘na stela, ‘na cometa, la mà dito de portar a sta nuda putelèta, questo bianco coredin…
Quel del mè Gesù Bambin”
liviana
Lascia un commento