Liviana Cunego
La me par ‘na vita / sensa vita, / quela de adesso / sensa de ti.
Scandìa solo / dal monotono ripetarse / del verzàr / e seràr le finestre/ su noti sensa sogni / e matine / prive de aspetative…
Fora, / no’ è cambiado gnente / l’erba del prà la cresse / el sol el capita in casa / sensa gnanca / dimandar parmesso / i fiori i spanisse / i merli i canta… / a dispeto, che pìoa / o tira vento
Sempre. / …come sempre…
Cissà se adesso / te si ti, i fiori /che macia de colori /el verde del giardin /oppure la rosa rampeghina /coi piè par tera /e la testa /spersa fra le nuvole /là in sima… /O magari, te si l’aria /che, passando, /me sfiora la guancia… /
Cissà se te te vedi /se te li vedi, /se te me senti, /se te me lesi… /
Cissà se ancora /te me bròntoli /quando le me /maldestre mane /
le fa sù un roèo /de diei, de diesis, /de note sbarlòte /sui tasti del piano… /
Però crèdeme: /no me sà MAI ingarbuià /el filo del ricamo! /
Forse el piano nol fa par mi… /
La MUSICA, te resti TI /
Voi crèdar, che te si qua! /Magari sconto, /par farme un scherso. /
VOI CREDAR! /
Parché /mè impossibile /crèdar /… de averte par sempre perso.
liviana 31/5/2024
Lascia un commento